Rheinmetall Ukraynaya 139 ədəd Leopard tankı verməyə hazır olduğunu bəyan etdi

Almaniyanın Rheinmetall müdafiə konserni Ukraynaya ümumilikdə 139 Leopard tankı göndərə bilər.

Median.Az xəbər verir ki, bu barədə konsernin nümayəndəsi Redaktionsnetzwerk Deutschland redaksiya birliyinə müsahibəsində bildirib.

"Bizim 22 Leopard 2A4 maşınımız var ki, onları istismara hazırlayıb Ukraynaya göndərə bilərik”, - konsernin nümayəndəsi bildirib. Onun sözlərinə görə, bu maşınların təmiri bir ilə yaxın vaxt aparacaq.

"Çatdırılma 2023-cü ilin sonu - 2024-cü ilin əvvəlində mümkündür. Daha 29 Leopard 2A4 var ki, onlar 2023-cü ilin aprel-may aylarında tədarük üçün hazır olacaq”.

"Biz daha 88 Leopard 1-i əlçatan edə bilərik", - konserndən deyilib.

Bundan əvvəl "Süddeutsche Zeitung” qəzeti öz mənbələrinə istinadən yazıb ki, Almaniya kansleri Olaf Şolz ABŞ-ın Ukraynanı "Abrams” tankları ilə təmin edəcəyi halda Kiyevə "Leopard 2” döyüş tanklarının tədarükünə icazə verməyə hazırdır.

Son günlər alman tanklarının Kiyevə köçürülməsi üçün Berlinə təzyiqlər xeyli artıb. Bəzi ölkələr, o cümlədən Polşa və Finlandiya Ukraynaya Leopard verməyə hazır olduqlarını bildirsələr də, bunun üçün Berlinin razılığı lazımdır. Almaniya XİN tankların Polşa tərəfindən göndəriləcəyinə etiraz etməyəcəyini bəyan edib.