Karantin rejiminin yumşaldılması ilə fəaliyyətinə icazə verilən sahələrdən biri də geyim istehsalıdır. Bildiyimiz kimi, bu aylar ərzində geyimə böyük tələbat yaranmışdı. Məhz bu tələbatı nəzərə alaraq, ölkəmizdəki geyim istehsalı ilə məşğul olan müəssisələr tam gücü ilə işə başlayıblar.
Baku TV xəbər verir ki, Bakı Toxuculuq Fabrikinin işçiləri karantin müddətində itirilən hər müddətin əvəzini indi maksimum şəkildə çıxmağa çalışırlar.
230-dan çox işçisi olan müəssisədə artıq, demək olar ki, hər kəs iş başındadır. 30 nəfər isə həm sıxlıq, həm də yaş həddinə görə evdə qalsa da, əməkhaqlarını ala bilirlər.
Fabrikin rəhbəri Səkinə Babayeva bildirib ki, bu çətin dövr ərzində işçilərin sayı nəinki azaldılmayıb, hətta maska istehsalı sahəsinin işə düşməsi ilə 52 nəfər artıb. Elə məhsulları xarici bazarlara çıxarmaq da mümkün olub. Lakin müəyyən çətinliklər də yaşanıb.
Səkinə Babayevanın sözlərinə görə, əsas məqsədləri fabrikə yeni işçilər cəlb etməklə yaranan boşluqları doldurmaq və əvvəlki məhsuldarlığın bərpasıdır. Bununla da, Made in Azerbaijan brendi altında vətəndaşlarımız öz yerli məhsullarımızı seçə biləcəklər.