“Ehtiyac olarsa, özəl və təsərrüfat hesablı tibb müəssisələrinin də pandemiya xəstəxanalarına çevrilməsi müzakirə oluna bilər”.
Oxu.Az xəbər verir ki, bunu Nazirlər Kabineti yanında Operativ Qərargahın KİV nümayəndələri üçün keçirilən brifinqində TƏBİB-in İdarə Heyətinin sədri Ramin Bayramlı deyib.
TƏBİB sədri bildirib ki, istənilən vəziyyətlə bağlı alternativ planlarımız var:
“Bu gün nəyi tətbiq ediriksə, aylar əvvəl ekspertlər tərəfindən hazırlanmış qərarlardır. Elə bir qərar qəbul edilərsə, özəl xəstəxanalar da, dövlətin təsərrüfat hesablı xəstəxanaları da prosesə qoşula bilər. Yəni bu mövzuda qoşulma imkanlarımız genişdir. Əsas odur ki, digər tibbi xidmətlər zərər görməsin”.
O deyib ki, ölkədəki bütün xəstəxanaları, bütün çarpayı fondunu koronavirusla mübarizəyə yönəldib, əlavə həkimlər də tapıb gətirmək olar: “Onları COVİD-19-la məşğul olmağa cəlb edə bilərik. Məsələ budur ki, bütün çarpayı sayı doldu, digər xəstələr necə olacaq, onları necə müalicə edəcəyik? Bu prosesdə hərtərəfli düşünmək lazımdır”.