“Məni vadar etməsəydi, onu öldürməzdim”.
Bunu Prezident İlham Əliyevin imzaladığı əfv sərəncamı ilə azadlığa çıxan məhbus, 1953-cü il təvəllüdlü Quliyev Eyvaz İsmayıl oğlu deyib.
E.Quliyev törətdiyi cinayətdən peşman olduğunu bildirib:
“Heç kim istəməz ki, yolu cəzaçəkmə müəssisəsinə düşsün. Məni vadar etməsəydi, belə olmazdı. Çox peşmanam. Cinayətə görə 13 il iş kəsdilər. Onun 8 il 10 ayı həbsdə keçib. Cəzamın bitməsinə 3 il 2 ay vaxt qalıb.
Allah ölkə başçımızdan razı olsun. Təşəkkür edirəm ki, belə humanist addım atıb. Əfv siyahısında adımın olduğunu eşidəndə, çox sevindim”.
E.Quliyev 11 uşaq atası olduğunu deyib:
“Səkkiz oğlum, üç qızım var. Neçə ildir ailəm, uşaqlarım üçün darıxırdım. Prezidentimiz sağ olsun, mənim kimi 176 nəfərin məhkumluq həyatına son qoydu”.
Qeyd edək ki, 67 yaşlı məhkum Eyvaz İsmayılov Cinayət Məcəlləsinin 120.2.3-cü maddəsi ilə 13 il müddətinə azadlıqdan məhrum edilmişdi.
Xatırladaq ki, Prezident İlham Əliyevin imzaladığı sərəncam yaşı 65-dən yuxarı olan 176 nəfərə şamil edilib.
/oxu.az/