""Əmək pensiyaları haqqında" Qanuna əsasən, 1992-ci il yanvarın 1-dək keçmiş SSRİ-nin hər hansı ərazisində qazanılmış əmək stajı ümumi qaydada sığorta stajına daxil edilir. Lakin Azərbaycan Respublikası və Rusiya Federasiyası arasında pensiya sahəsində əməkdaşlıq Sazişi olmadığından sonrakı dövrdə, yəni 1992-ci il yanvarın 1-dən sonra Rusiyadakı əmək stajı nəzərə alınmır".
Bunu Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsinin müdiri Fazil Talıbov Sputnik Azərbaycan-a açıqlamasında deyib.
O bildirib ki, vətəndaşların Rusiya Federasiyası ərazisində fəaliyyət dövrü üçün o ölkənin Dövlət Sosial Müdafiə Fonduna pul köçürmələri barədə məlumat da mövcud deyil: "Hazırda "Azərbaycan Respublikası və Rusiya Federasiyası arasında pensiya təminatı sahəsində Müqavilə" layihəsinin hazırlanması üzrə danışıqlar gedir. Məqsəd Rusiyada sığortaolunan kimi fəaliyyət göstərən Azərbaycan Respublikası vətəndaşlarının gələcəkdə pensiya və sosial sığortalanma üzrə hüquqlarının təmin olunması üçün hüquqi əsasların yaradılmasıdır".