Zukerberq istifadəçilərin məlumatlarını saxlamayacağına dair söz verdi

"Facebook"-un rəhbəri Mark Zukerberq şirkətinin gələcəyini necə gördüyü barədə öz rəsmi bloqunda verdiyi açıqlamada paylaşıb. Zukerberqin sözlərinə görə, "Facebook" qərara gəlib ki, özəl həyatın toxunulmazlığı və söz azadlığının pozulduğu ölkələrdə məlumat emalı mərkəzləri tikməsin və istifadəçilərə dair məlumatları saxlamasın.

Median.Az insider.az-a istinadən bildirir ki, Zukerberq bu qərarın "Facebook" xidmətlərinin bəzi ölkələrdə bloklanmasına gətirib çıxaracağını bildirir.

"Facebook" rəhbəri söyləyir ki, məlumatların ən yaxşı mühafizə üsulu onların saxlanılmamasıdır. "WhatsApp" artıq çoxdan şifrələmə açarlarını saxlamır və "Facebook"-un digər xidmətləri gələcəkdə sırf belə modelə keçəcək.

Yeri gəlmişkən, "Facebook" iki tərəfi açıq şifrələmə hesabına "Messenger" və "WhatsApp"-ı daha özəl etməyi düşünür.

Zukerberq həmçinin yeni kontent saxlanma sistemi barədə danışıb. Məsələn, yeni sistemə əsasən, mesajlar bir ay ya bir ildən sonra avtomatik silinə ya arxivləşə bilərlər. Bu da öz növbəsində istifadəçi məlumatlarının "üzə çıxıb" onu nüfuzdan salmaq təhlükəsini azaldacaq. Mesajları bir neçə dəqiqə və saniyə sonra silməklə belə funksiyanı söndürmək ya nizamlamaq da olar.