Median.Az xəbər verir ki, Binəqədi RPİ 6-cı polis bölməsi əməkdaşlarının keçirdikləri əməliyyat-axtarış tədbirləri nəticəsində iyulun 3-də rayon ərazisindəki avtomobildən 850 manat, noutbuk, sənəd və açarlar oğurlayan Bakı şəhər sakini, əvvəllər məhkum olunmuş M.Bağırov saxlanılıb.
Ondan 1 ədəd 100 manatlıq saxta əskinas, bıçaq və 1,780 qran heroin götürülüb.

Araşdırma zamanı, onun bu il fevralın 16-dan aprelin 18-dək olan müddətdə 4 avtomobildən pul və məişət əşyaları oğurlaması məlum olub.

Bundan başqa, Binəqədi RPİ 40-cı polis bölməsi əməkdaşlarının keçirdikləri əməliyyat-axtarış tədbirləri nəticəsində bu il aprelin 2-də vətəndaş O.Fərmanova məxsus avtomobildən 100 manat oğurlayan Bakı şəhər sakini R.Ağayev saxlanılıb.

Binəqədi RPİ 5-ci polis bölməsi əməkdaşlarının keçirdikləri əməliyyat-axtarış tədbirləri nəticəsində iyulun 3-də paytaxt sakini M.Ramazanovanın mobil telefonunu oğurlayan Bakı şəhər sakini, əvvəllər məhkum olunmuş V.Dəmirçiyev saxlanılıb. Araşdırma zamanı, onun aprelin 22-dən iyunun 26-dək olan müddətdə 2 avtomobildən pul və sənəd, habelə N.Yusifliyə məxsus velosipedi oğurlaması müəyyən edilib.

Nərimanov RPİ 16-cı polis bölməsi əməkdaşlarının keçirdikləri əməliyyat-axtarış tədbirləri nəticəsində iyulun 10-da Bakı şəhər sakini X.Bağırova məxsus “Hyundai” markalı avtomobildən, içərisində 200 manat və sənəd olan pul kisəsini oğurlayan Sumqayıt şəhər sakini, əvvəllər məhkum olunmuş S.Cavadov saxlanılıb. Ondan 0,427 qram heroin götürülüb.

Faktlarla bağlı cinayət işləri başlanılıb.скачать dle 11.3