İran nefti bütün dünyada qadağan olunacaq

ABŞ Dövlət Departamenti İran neftinin idxalçılarından olan bir sıra dövlətlərin müvəqqəti olaraq sanksiyalardan azad edilməsi ilə bağlı qərarı mayın 2-dən etibarən qüvvədən salmağa hazırlaşır.

Bu barədə “Washington Post” və “Wall Street Journal” Dövlət Departamentinin rəsmilərinə istinadən məlumat verir.

ABŞ ötən ilin noyabr ayında İrana qarşı sanksiyalar tətbiq edən zaman səkkiz ölkəyə yarım il ərzində (2 may 2019-ci ildə) İran neftini almağa icazə vermişdi. Vaşinqton buna görə həmin ölkələrə idxal həcmini tədricən azaltmağı şərt qoymuşdu.

Bu ölkələr arasında Çin, Hindistan, İtaliya, Yunanıstan, Yaponiya, Cənubi Koreya və Tayvan yer alır. Onlardan üçü (Yunanıstan, İtaliya və Tayvan) artıq İrandan neft idxalı həcmini tamamilə dayandırıb.

Cənubi Koreya və Yaponiya isə əvvəlki illərlə müqayisədə, İran neftindən asılılığı xeyli azaldıb.