Biləsuvar rayonunun Bolharı çayının sahili zibilxanaya çevrilib.
Median.Az xezerxeber.az-a istinadən bildirir ki, mövsümün qış, havanın soyuq olmasına baxmayaraq, məişət tullantılarının üfunəti kənardan hiss olunur.
Burada sahil boyu it və qoyun leşlərinə, uşaq bezlərinə və hər cür məişət tullantılarına rast gəlmək mümkündür.
Sakinlərin sözlərinə görə, məişət tullantılarını çaya elə sakinlərin özləri atırlar. Səbəb kimi isə ərazidə zibil qutularının olmaması göstərilir.
Onu da öyrəndik ki, sözügedən ərazidə əvvəllər zibil qutuları qoyulubmuş. Sonradan iki küçənin sakinləri arasında baş verən mübahisə səbəbindən qutular ordan götürülüb.
Məsələ ilə bağlı Biləsuvar Şəhər Kommunal Kombinatının iş icraçısı Qeyrətəli Məmmədov bildirdi ki, həmin ərazidə dəfələrlə təmizlik işləri aparılıb. Amma sakinlər məişət tulantılarının daşınması üçün kombinatla müqavilə bağlamaqdansa, zibilləri çay sahilinə tökməyə üstünlük verirlər.
Kombinatdan bildirdilər ki, buna baxmayaraq, qısa vaxt ərzində problem aradan qaldırılacaq.
Şahidi olduğunuz hadisələri çəkib bizə göndərin!
Son Əlavə