Ramil Usubovdan daha yeddi təyinat - SİYAHI

Daxili işlər naziri, general-polkovnik Ramil Usubov daxili işlər orqanlarında yeddi yeni təyinat üzrə əmr imzalayıb.

Median.Az-ın məlumatına görə, bir neçə polis idarəsi rəislərinin yeri dəyişdirilib.

Müvafiq olaraq Nərimanov Rayon Polis İdarəsinin rəisi Nəriman İmanov vəzifəsindən azad olunaraq Sumqayıt Şəhər Polis İdarəsinin rəisi, Sumqayıt Şəhər Polis İdarəsinin rəisi Əkbər İsmayılov vəzifəsindən azad olunaraq Gəncə Şəhər Baş Polis İdarəsinin rəisi, Yasamal Rayon Polis İdarəsinin rəisi İsfəndiyar Mehbalıyev vəzifəsindən azad olunaraq Xəzər Rayon Polis İdarəsinin rəisi, Yevlax Rayon Polis Şöbəsinin rəisi Vaqif Müslümov vəzifəsindən azad olunaraq Nərimanov Rayon Polis İdarəsinin rəisi təyin edilib.

Şəmkir Rayon Polis Şöbəsinin rəisi Cəmil Əmirov vəzifəsindən azad olunaraq Yasamal Rayon Polis İdarəsinin rəisi, Səbail Rayon Polis İdarəsinin rəisi Şəmşir Kazımov vəzifəsindən azad olunaraq İsmayıllı Rayon Polis Şöbəsinin rəisi, Mingəçevir Şəhər Polis Şöbəsinin rəisi Cavid Muradov vəzifəsindən azad olunaraq Səbail Rayon Polis İdarəsinin rəisi vəzifəsinə təyin olunublar.

Əldə edilən məlumatları rəsmi olaraq Oxu.Az saytına Daxili İşlər Nazirliyinin mətbuat xidmətinin rəis müavini Orxan Mansurzadə təsdiq edib.

Xatırladaq ki, Gəncə Şəhər Baş Polis İdarəsinin və Xəzər Rayon Polis İdarəsinin rəsiləri- müvafiq olaraq Faiq Şabanov və Azər Muradov tutduqları vəzifədən azad edilərək sərəncama götürülüblər.

Qeyd edək ki, bununla bağlı ilk məlumatı Report yayıb.