Süni intellekt və robot texnologiyalarının sürətlə inkişaf etməsi əmək bazarının gələcəyi ilə bağlı müxtəlif sualları gündəmə gətirir. Bir çox sahələrdə insan əməyinin avtomatlaşdırılması imkanlarının genişlənməsi gələcəkdə işləyənlərin sayına, sosial sığorta ödənişlərinə və pensiya sisteminin dayanıqlılığına təsir göstərə bilər. Bu isə xüsusilə indiki gənc nəslin gələcəkdə pensiya təminatı ilə bağlı narahatlıqları artırır.

İnformasiya Texnologiyaları üzrə mütəxəssis Fərid Əmirov Median.Az-a açıqlamasında deyib ki, süni intellekt və avtomatlaşdırma ənənəvi iş dünyasını kökündən dəyişir və bu dəyişiklik gələcəkdəki maliyyə təminatımıza birbaşa təsir edir:

“Əvvəllər bir dəfə öyrənilən peşə insanı 30-40 il rahat yaşada bilirdisə, bu gün texnologiyanın sürətli inkişafı biliklərin köhnəlmə müddətini 3-5 ilə qədər endirib. Klassik "öyrən, işlə və pensiyaya çıx" yanaşması artıq öz aktuallığını itirir. Digər tərəfdən, insan əməyi fiziki və zehni olaraq gündəlik 8 saatla məhdudlaşdığı halda, kompyuter proqramları və süni intellekt heç bir yorğunluq bilmədən fasiləsiz işləyir. Bu səbəbdən, gələcəkdə sadəcə zamanımızı və fiziki əməyimizi sataraq özümüzə dayanıqlı kapital, yəni rahat bir qocalıq fondu yaratmaq getdikcə çətinləşəcək”.

O qeyd edib ki, bu yeni dövrdə ayaqda qalmaq və gələcəyimizi sığortalamaq üçün fərqli düşünməyə ehtiyac var:

“Əsas məsələ süni intellektdən qorxmaq deyil, onu öz işimizdə bir köməkçi kimi istifadə etməyi öyrənməkdir. Çünki gələcəyin əsas rəqabəti robotlarla insanlar arasında deyil, süni intellektdən istifadə etməyi bacaran insanlarla ənənəvi üsullarla işləyənlər arasında olacaq. Eyni zamanda, sadəcə maaşa güvənməkdən çıxıb, iqtisadiyyatın və texnologiyanın inkişafına ayaq uyduran sahələrə kiçik də olsa şəxsi sərmayələr yatırmaq vacibdir. Qısacası, gələcəyin ən etibarlı təminatı davamlı olaraq yeni biliklər öyrənmək və texnologiyanı rəqib kimi yox, öz xeyrimizə işləyən faydalı bir alət kimi görməkdir”.

Ayselскачать dle 11.3