Məktəb qarşısında təhlükə yaradan sürücü cəzalandırıldı - Video

Sabunçu rayonunun Zabrat qəsəbəsində yerləşən 75 nömrəli tam orta məktəbin qarşısında təhlükəli hərəkətlər edən sürücü ilə bağlı araşdırma aparılıb.

Median.Az patrul.az-a istinadən xəbər verir ki, Bakı Şəhər Dövlət Yol Polisi İdarəsi bildirib ki, videogörüntü əsasında sürücünün şəxsiyyəti müəyyən edilib və onun barəsində qanunamüvafiq tədbir görülüb.

Xatırladaq ki, görüntülərdə 10-VP-389 dövlət qeydiyyat nişanlı “Mercedes-Benz” markalı avtomobilin sürücüsünün küçə şəraitinə uyğun olmayan yüksək sürətlə hərəkət edərək döngəyə daxil olması, əyləcləməyə baxmayaraq idarəetməni itirməsi və yol kənarında dayanan velosipedi vurması əks olunurdu. Hadisə zamanı ərazidə çoxlu sayda uşağın olması isə ictimai narahatlığa səbəb olmuşdu.