15 kiloqram narkotiklə yaxalanan şəxslərə HÖKM OXUNDU

15 kiloqram narkotik vasitə olan marixuana ilə yaxalanan şəxslərin işi üzrə məhkəmə prosesi keçirilib.

Lənkəran Ağır Cinayətlər Məhkəməsində hakim Neymət Məmmədovun sədrliyi ilə baxılıb.

Belə ki, Ramil Nuriyev və Murad Həmzəyev Bəhruz adlı İran vətəndaşı tərəfindən maddi maraq qarşılığında narkokuryerlik etməyə razılıq veriblər. Təqsirləndirilənlər külli miqdarda narkotik vasitəni əldə etmək, saxlamaq və daşımaq üçün qabaqcadan əlbir olan qrup şəklində hərəkət ediblər. Onlar 10-15 min manat qarşılığında əldə etdikləri narkotik vasitəni bildirilən ünvana çatdırmağa razılaşıblar.

R.Nuriyev və M.Həmzəyev daha sonra razılaşdırılan kimi Zəngilan rayonunun Bartaz kəndinin ərazisində gizlədilmiş külli miqdarda narkotik vasitələri daşımaq üçün 2 oktyabr 2024-cü il tarixdə "Hyundai ix35" minik avtomobilini icarəyə götürüblər. Onlar portal icazəsi olmadan işğaldan azad edilmiş ərazilərə keçə bilməyəcəklərini bildikləri üçün komendant postlarından maneəsiz keçmək üçün birlikdə özbaşına özlərini vəzifəli şəxs, yəni Azərbaycan Respublikası Dövlət Sərhəd Xidmətinin Sərhəd Qoşunlarının hərbi qulluqçusu kimi təqdim etmək qərarına gəliblər.

Təqsirləndirilənlər məqsədlə Şirvan şəhəri ərazisində yerləşən hərbi geyimlər satılan mağazadan özləri üçün Sərhəd Qoşunlarının hərbi qulluqçularına aid olan hərbi geyim formasını alaraq və Salyan rayonu, Qarabağlı kəndində Sərhəd Qoşunlarının "N" saylı hərbi hissəsinin balansında olan MAZ markalı yük avtomobilinə aid iki ədəd hərbi qeydiyyat nömrə nişanını götürüblər.

Onlar Beyləqan rayonunun Birinci Şahsevən kəndi ərazisində keçirilən əməliyyat zamanı saxlanılıblar.

Avtomobilə baxış zamanı ümumilikdə 14 770 qram qurudulmuş marixuana aşkar edilərək maddi sübut kimi götürülüb.

Lənkəran Ağır Cinayətlər Məhkəməsinin qərarı ilə onlar Cinayət Məcəlləsinin 234.4.1, 234.4.3-cü maddələri ilə təqsirli bilinərək altı il altı ay müddətində azadlıqdan məhrum ediliblər.
//oxu.az