ABŞ-da beynəlxalq bir DVD şirkətinin sabiq əməkdaşı, yüzlərlə ön göstərim DVD və Blu-ray disklərini oğurlayıb internetə yaydığına görə 4 il 9 ay müddətinə azadlıqdan məhrum edilib. ABŞ ədliyyə nazirliyi cümə axşamı hökmü elan edib.

Steven Heyl 2021–2022-ci illərdə çalışdığı şirkətdən filmləri gizli şəkildə götürüb elektron ticarət platformaları vasitəsilə satdığını etiraf edib. Onun sızdırdığı filmlər arasında "Dune”, "F9: The Fast Saga” və "Venom: Let There Be Carnage” kimi böyük maraq doğuran ekran işləri də olub.

Ən böyük zərərin isə "Spider-Man: No Way Home” filminin yayılması ilə baş verdiyi açıqlanıb. 2021-ci ildə yalnız kinoteatrlarda nümayiş olunan film, pandemiya sonrası 1 milyard dollardan artıq gəlir toplayan ilk layihə olmuşdu. Lakin qeyri-qanuni kopyaların satışa çıxması səbəbilə istehsalçılar on milyonlarla dollar itki ilə üzləşib.

Həmin dövrdə pirat nüsxələr o qədər geniş yayılıb ki, təhlükəsizlik şirkətləri saxta fayllara zərərli proqramların yerləşdirildiyini də hesabatlarda qeyd edib. Heylin orijinal Blu-ray diskdən hazırladığı yüksək keyfiyyətli kopya isə rəsmi satışdan təxminən bir ay əvvəl internetdə yayımlanıb.

38 yaşlı Heylin əvvəllər silahlı qarət cinayətinə görə sabiqası olub. Bu iş üzrə 15 ilə qədər cəza ala biləcəyi bildirilsə də, prokurorluqla razılaşmaya görə müddət maksimum 5 ilə endirilib.

Polisin evdə apardığı axtarışda içərisində güllə olan tapança və əlavə 13 patron aşkar edilib. Sabiqəli olduğuna görə silah gəzdirməsi qanunsuz idi. Buna görə o, "cinayətkar olaraq odlu silah saxlama” ittihamını da qəbul edib.

Nəticədə, DVD oğurluğu və silah cinayətləri birləşdirilərək Tennessi federal məhkəməsi tərəfindən Steven Heyl 57 ay həbs cəzasına məhkum edilib.

ABŞ ədliyyə nazirliyinin rəsmisi Mettyu R. Qaleotti açıqlamasında bildirib: "Bugünkü hökm, Amerikan yaradıcılığını piratçılıqdan qorumaq əzmimizin göstəricisidir. Başqalarının zəhmətini qısa müddətli qazanc üçün sui-istifadə edənlər, bu işdə olduğu kimi, ciddi bədəl ödəyəcəklər".
//qaynar.azскачать dle 11.3