Azərbaycan və Qazaxıstan infrastruktura investisiyaları artırmağa, rəqəmsal texnologiyaların imkanlarından fəal istifadə etməyə və iqtisadi əməkdaşlığın daha da gücləndirilməsi üçün maliyyə ekosistemini cəlb etməyə davam etməlidir.

Bu, "Astana" Beynəlxalq Maliyyə Mərkəzi və ADA Universitetinin nəzdində fəaliyyət göstərən İnkişaf və Diplomatiya İnstitutunun (IDD) hazırladığı iki ölkə arasında iqtisadi əməkdaşlığın dərinləşdirilməsi perspektivləri haqqında analitik hesabatda öz əksini tapıb.

Sənəddə qeyd olunub ki, Orta Dəhlizin inkişafı və Xəzər dənizinin dibi ilə sualtı fiber-optik xəttin çəkilişi (layihəyə investisiya qoyuluşu 50 milyon ABŞ dollar məbləğində qiymətləndirilir – red.) iki ölkənin Asiya və Avropa arasında mühüm tranzit qovşaqları kimi mövqelərini gücləndirir.

"Neft ixracının artması, "yaşıl enerji” sahəsində layihələrin həyata keçirilməsi, ticarətin aktivləşdirilməsi və maliyyə əməkdaşlığı dayanıqlı iqtisadi model formalaşdırır, Qazaxıstan-Azərbaycan strateji tərəfdaşlığı investisiyaların cəlb edilməsinə, regional sabitliyin gücləndirilməsinə və xarici tərəfdaşlarla əlaqələrin genişləndirilməsinə kömək edir", - sənəddə vurğulanıb.

Hesabat müəllifləri hesab edirlər ki, Azərbaycan və Qazaxıstan strateji və gələcəyə yönəlmiş yanaşmaya sadiq qalmaqla öz geoiqtisadi potensialını reallaşdıra, daha çox xarici investisiya cəlb edə və İpək Yolu regionunda lider mövqelərini möhkəmləndirə bilər. Analitiklərin fikrincə, birgə fəaliyyət Azərbaycan və Qazaxıstan iqtisadiyyatlarına fayda gətirməklə yanaşı, həm də regional rifaha, sabitliyə və beynəlxalq əməkdaşlığın genişlənməsinə töhfə verəcək.
//reportскачать dle 11.3