Apellyasiya Məhkəməsi Ermənistanın Qarabağdakı işğalçı kontingentinin keçmiş komandiri Calal Arutyunyanın hökmünü qüvvədə saxlayıb - onu 5.5 il həbs gözləyir.
Bu barədə Ermənistan KİV məlumat verib.
Bu ilin fevralında Ermənistanın Sünik vilayətinin ümumi yurisdiksiya məhkəməsi Arutyunyanı 5.5 il müddətinə azadlıqdan məhrum edib.
Arutyunyana qarşı 2020-ci ilin 44 günlük müharibəsi ilə bağlı iki epizod üzrə iş açılıb. Bunlardan biri oktyabrın əvvəlində cənubda həyata keçirilən və erməni tərəfi üçün uğursuz nəticələnən əks-hücum əməliyyatına aiddir. İstintaqın məlumatına görə, Arutyunyanın hərəkətləri canlı qüvvə və zirehli texnikanın böyük itkisinə səbəb olub, ehtiyatda olan qüvvələr yararsız hala düşüb, atəş mövqeləri Azərbaycan Silahlı Qüvvələrinin nəzarətinə keçib.
Digər epizod 2020-ci il oktyabrın 12-də Füzuli yaxınlığında artilleriya diviziyasının şəxsi heyətinin məhv edilməsi ilə bağlıdır. İttihama əsasən, bölmənin hərbçiləri, o cümlədən komandanlığın və xüsusən də Arutyunyanın yanlış məlumatları nəticəsində mühasirəyə alınıb.
İttihamlar irəli sürüldükdən sonra o, 2022-ci ilin sentyabrında həbs edilib.
Xatırladaq ki, Calal Arutyunyan 44 günlük müharibənin əsas dövründə - 2020-ci il oktyabrın 27-dək ağır yaralanana qədər Qarabağda işğalçı Ermənistan qoşunlarına rəhbərlik edib. Bundan sonra komandanlıq general Mikael Arzumanyana keçib.
Şahidi olduğunuz hadisələri çəkib bizə göndərin!
Son Əlavə