Dələduzun vətəndaşa dəyən ziyanı qaytarmaq imkanı yoxdursa, pulu kim ödəyir? - AÇIQLAMA

Son zamanlar bir çox insanlar dələduzların qurbanına çevrilirlər. Onların əksəriyyəti yaşadığı dələduzluq hadisəsi haqda polisə məlumat verirlər.

Dələduz tutulandan sonra əgər imkanı yoxdursa, vətəndaşa dəyən ziyan necə ödənilir?

Məsələ ilə bağlı hüquqşünas Vamiq Şükürov bildirib ki, əgər zərərçəkən şəxs məhkəmə mülki qaydada iddia qaldırıb bildirsə ki, ona dəymiş ziyan ödənilsin o zaman məhkəmə cinayət işinə görə cəza verməklə bərabər, dəymiş ziyanın tutulması barəsində hökm çıxarır. Burda artıq dələduz cəza çəkdi ya çəkmədi fərqi yoxdur. Hökm qəbul olunandan sonra icra olunmaq üçün göndərilir cəza çəkən şəxsin qeydiyyatda olduğu ünvanın Ədliyyə Nazirliyinin məhkəmə qərarlarını icra edən şöbələrinə.

Yəni, şəxs azadlıqdan məhrum edilsə də, edilməsə də onun adına mülki məsuliyyəti qalır. Hüquqşünas qeyd edir ki, icra şöbələrinin məmurları pul məbləğinin zərərçəkənə geri qaytarılması üçün şəxsin adına olan daşınmaz əmlakları, bank hesablarını alır. Əmlak hərrac yolu ilə satışa çıxarılır və borc ödənilir.

Bəs şəxsin adına əmlak yoxdursa nə baş verir?

Əgər şəxsin adına əmlak yoxdursa, şəxs cəzaçəkmə müəssəsindədirsə, bu zaman o, azadlığa çıxdıqdan sonra əmlək məsuliyyətini yerinə yetirməlidir. Əgər o işləyərsə, onun əməkhaqqından tutula, ölkədən çıxışına qadağa qoyula bilər. Əgər şəxs azadlığa çıxdıqdan sonra borcunu ödəməzsə, onu ilk öncə cərimə daha sonra inzibati həbs verilə bilər. Bir sözlə, əgər dələduzluğa məruz qalmısızsa, məbləğ dərhal geri qaytarılmır.
//valyuta.az