ABŞ-nin məşhur "Disney Entertainment" film şirkəti özünün törəmə şirkəti olan "ABC News Group"da və "Disney Entertainment Networks" bölməsində 200-ə yaxın əməkdaşını ixtisar etmək niyyətindədir.
Bu barədə "The Wall Street Journal" (WSJ) qəzeti mənbələrə istinadən məlumat verib.
Məlumata görə, ixtisarlar ümumilikdə iki bölmənin təxminən altı faiz iş yerini əhatə edəcək, rəhbərlik qərarını martın 5-də açıqlamağı planlaşdırır.
Bunun fonunda nəşr xatırladır ki, son illərdə "Disney" xərclərə qənaət proqramı çərçivəsində artıq bir neçə raund ixtisar həyata keçirib. Bundan əlavə, şirkət digər, biznesin daha rəqabətli sahələrinin inkişafına xərcləri artırmağı planlaşdırır ki, bura idman və əyləncə kontentlərinin istehsalı da daxildir.
Bir çox Birləşmiş Ştatlar sakinlərinin kabel televiziyasından imtina etməsi, reklamçıların striminq xidmətlərinə və rəqəmsal platformalara keçməsi nəticəsində "Disney"in reytinqləri və gəlirləri son vaxtlar aşağı düşüb.
Qəzetin mənbələrinin qeyd etdiyi kimi, "ABC News" həmçinin özünün bir neçə bölməsini birləşdirmək və 15 işçinin redaktor olaraq çalışdığı 538 ("FiveThirtyEight") xəbər saytını bağlamaq niyyətindədir. Şirkət eyni zamanda "Good Morning America" ("Sabahın xeyir Amerika") şousunun hazırlanmasında iştirak edən rəhbər işçilərin sayını bir nəfərə qədər endirməyi də planlaşdırır.
"Disney Entertainment Networks" bölməsində isə öz növbəsində ixtisarlar televiziya proqramlarının planlaşdırılması və cədvəllərinin tərtib edilməsinə cavabdeh olan işçilərə aid ediləcək.
Şahidi olduğunuz hadisələri çəkib bizə göndərin!
Son Əlavə