Ali Məhkəmədə üç bacıya məxsus 333 min manatdan artıq pulu mənimsəməkdə təqsirləndirilən özəl tibb mərkəzinin kardioloq həkimi Dilbər Həsənəliyevanın barəsindəki hökmdən verilən kassasiya şikayəti üzrə məhkəmə iclası başa çatıb.

Median.Az Pravda.az-a istinadən xəbər verir ki, hakim İlqar Cəfərovun sədrliyi ilə keçirilən prosesdə qərar elan olunub.

Qərara əsasən, şikayət təmin edilməyib.

İttihama görə, Dilbər Həsənəliyeva hotel və tikinti biznesinə sərmayə qoymaq adı ilə üç bacıya məxsus 333 677.98 manatı mənimsəyib. Belə ki, Dilbər Həsənəliyevanın anası Tamilla İdris qızı Həsənəliyeva Geologiya və Geofizika İnstitutunda aparıcı elmi işçi, elmlər namizədi, dosent vəzifəsində çalışıb. O, anasının rəfiqəsi və iş yoldaşı Aytən adlı qadına Goranboyda hotel və tikinti biznesinə yatırım etmək təklifini edib.

Aytən özü də Geologiya və Geofizika İnstitutunda aparıcı elmi işçi olub. Zərərçəkmiş qadın Tamilla Həsənəliyeva ilə iş yoldaşı olduğuna və ona inandığına görə Dilbər Həsənəliyevanın təklifinə razılıq verib. Aytənin 2005-ci ildə dünyasını dəyişən atası Nəriman Məmmədov Bakı şəhəri, Səbail rayonu, Zərifə Əliyeva küçəsində yerləşən mənzilin satılaraq övladları arasında bölünməsini vəsiyyət edib. Həmin mənzil satıldıqdan sonra pullar Aytən, Gültən və Kübra bacıları arasında bölünüb. Bacılar 250 min manata yaxın vəsaiti bankların birində Aytənə etibarnamə vermək yolu ilə depozitə qoyublar. Aytən də bacılardan xəbərsiz həmin vəsaiti çıxarıb və üstəlik öz adına 55 min manat kredit götürərək, Dilbər Həsənəliyevaya hotel tikmək adı ilə verib. Dilbər Həsənəliyeva pulları ələ keçirdikdən sonra öz şəxsi ehtiyaclarına xərcləyib.

Ona qarşı Cinayət Məcəlləsinin 178.3.2-ci (dələduzluq) maddəsi ilə ittiham irəli sürülüb.

Bakı Ağır Cinayətlər Məhkəməsinin hökmü ilə Dilbər Həsənəliyeva 8 il müddətinə azadlıqdan məhrum edilib. Bakı Apellyasiya Məhkəməsi isə hökmü dəyişdirmədən qüvvədə saxlayıb.скачать dle 11.3