Beyləqanda vəzifəli şəxs zəhərlənərək öldü: Həyat yoldaşının VƏZİYYƏTİ AĞIRDIR (YENİLƏNİB)

"Beyləqanın Bünyadlı kəndində dəm qazından zəhərlənən 1974-cü il təvəllüdlü Şəlalə Firidun qızı Məmmədovanın vəziyyəti ağır qiymətləndirilir".

Bu məlumat oxu.az-n sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) verilib.

Qeyd olunur ki, 16 dekabr saat 20:30-da zəhərlənmə şübhəsilə 1974-cü il təvəllüdlü (qadın cinsli) şəxs Beyləqan Rayon Mərkəzi Xəstəxanasına hospitalizasiya olunub.

"Ona dəm qazından zəhərlənmə diaqnozu təyin edilib və daha sonra zəruri tibbi yardım göstərilməsi məqsədi ilə Bakı şəhərində yerləşən Kliniki Tibbi Mərkəzə təxliyə olunub. Kliniki Tibbi Mərkəzin Toksikologiya şöbəsinə hospitalizasiya edilən pasiyentin hazırda müalicəsi davam etdirilir. Vəziyyəti ağır qiymətləndirilir", - deyə məlumatda bildirilir.

Oxu.Az-ın əldə etdiyi digər məlumata görə, dəm qazından zəhərlənərək həyatını itirən 1966-cı il təvəllüdlü Bakir Heydər oğlu Məmmədovun isə Bünyadlı kənd mədəniyyət evinin müdiri olduğu məlum olub.

* * * * *

Beyləqanda ər və arvadı dəm qazından zəhərləniblər.

Median.Az "Report"a istinadən xəbər verir ki, hadisə rayonun Bünyadlı kəndində qeydə alınıb.

Kənd sakini, 1966-cı il təvəllüdlü Bakir Heydər oğlu Məmmədov dəm qazından zəhərlənərək ölüb, arvadı, 1974-cü il təvəllüdlü Şəlalə Firidun qızı Məmmədova dəm qazından zəhərlənmə diaqnozu ilə xəstəxanaya yerləşdirilib.

Faktla bağlı araşdırma aparılır.