Minaaxtaranlarımız Türkiyədə xüsusi təlimlərə qatılıblar - FOTO

Azərbaycan Silahlı Qüvvələrinin 23 nəfərlik şəxsi heyəti Türkiyədə təşkil olunan Xüsusi Mina Axtarış və Təmizləmə kursuna qatılıb.

Türkiyənin Müdafiə Nazirliyindən verilən xəbərə görə, sözügedən kurslar İzmir şəhərində 3-29 yanvar aralığında təşkil olunub. İstehkam Məktəbi və Təlim Mərkəzi Komandanlığındakı kursu müvəffəqiyyətlə bitirən əsgərlərimiz artıq İzmirdən Azərbaycana yola salınıb.

Qeyd edək ki, hazırda Azərbaycan və Türkiyə minaaxtaranları işğaldan azad olunmuş ərazilərin mina və əl istehsalı partlayıcı maddələrdən təmizləməsi işlərini birlikdə həyata keçirirlər.

Azərbaycan Ordusuna bu işdə dəstək məqsədilə bölgəyə göndərilən Türkiyə Quru Qoşunları Komandanlığının şəxsi heyəti minaaxtaranlarımıza yardım etməklə yanaşı, onlara təlim də keçir.