Dövlət-vətəndaş həmrəyliyi sayəsində ölkəmizdə koronavirus (COVİD-19) infeksiyasının yarada biləcəyi təhlükənin qarşısının alınması istiqamətində görülən məqsədyönlü tədbirlər nəticəsində sanitar-epidemioloji vəziyyətin stabilləşməsinə, yoluxma hallarının kəskin azalmasına nail olundu.

Nazirlər Kabineti yanında Operativ Qərargahın 29 avqust 2020-ci il tarixli qərarına əsasən ölkəmizdə sanitar-epidemioloji vəziyyətə uyğun olaraq bəzi məhdudiyyətlər aradan qaldırılmış, o cümlədən, muzey və sərgi zallarının fəaliyyəti bərpa olunub.

Vətəndaşların asudə vaxtlarının daha səmərəli təşkil olunması üçün muzeylərdə sanitar-gigiyena qaydalarının tələblərinə uyğun bütün şərait yaradılıb. Belə ki, muzeylərin girişində ziyarətçilərin hərarəti ölçülür, onlara maska, əlcək, dezinfeksiyaedici məhlul təqdim olunur. Həmçinin, muzey daxilində sosial məsafənin qorunması barədə xəbərdaredici lövhələr asılıb. Gün ərzində müvafiq qrafik üzrə muzeylərdə təmizlik-dezinfeksiya işləri həyata keçirilir.

Bununla yanaşı, karantin dövründən sonra muzeylərdə sanitar-gigiyenik qaydaların həyata keçirilməsinə nəzarət edilməsi məqsədilə Mədəniyyət Nazirliyinin Muzey işi və mədəni sərvətlərə nəzarət şöbəsinin əməkdaşları tərəfindən Azərbaycan Milli İncəsənət Muzeyi, Azərbaycan Milli Xalça Muzeyi, C.Cabbarlı adına Azərbaycan Dövlət Teatr Muzeyi, Azərbaycan Musiqi Mədəniyyəti Dövlət Muzeyi, Azərbaycan İstiqlal Muzeyi, Üzeyir Hacıbəylinin Ev-Muzeyi, Səməd Vurğunun Ev-Muzeyi və digər muzeylərə baxış keçirilib, yerində təhlillər aparılıb və müvafiq tövsiyələr verilib.

Beləliklə, 2 sentyabr 2020-ci il tarixindən həftənin çərşənbə axşamı-cümə günləri muzeylər ziyarətçiləri qəbul edəcək.

Məlumat üçün qeyd edək ki, muzeylərə virtual səyahət etmək imkanı yaradan museum.az saytı öz fəaliyyətini davam etdirir.скачать dle 11.3