Əməkdar artist: Azərbaycan qadınını ərəblərə intim xidmətə təklif edən kişini döydüm - VİDEO
Bakıya gələn ərəblər “Fəvvarələr” meydanında nalayiq hərəkətlər edirlər. Heç bir azərbaycanlı kişinin bu, xoşuna gəlmir. Əgər kimsə binamusluğu, bişərəfliyi boynuna götürürsə, bu, onun problemidir. Şəxsən mən bunu qəbul edə bilmirəm. Müəyyən insanlarımız var ki, Moskvada və Rusiyanın digər şəhərlərində özlərini ərəblər burada apardığı kimi aparırlar.
Bunu Əməkdar artist Bəhram Bağırzadə bəstəkar-müğənni Murad Arifin “Youtube”da yayımlanan “Popumuz var” verlişində deyib.
Sənətçi bir azərbaycanlı qadını intim xidmət göstərmək üçün ərəblərə təklif edən kişini döydüyünü etiraf edib:
“Başa düşürəm ki, bu sözlərimdən sonra hamı məni tənqid edəcək, amma bunları söyləməliyəm. Əgər ərəblər Bakıya gəlib özlərini pis aparırlarsa, deməli, burada günah bizdədir. Biz o səviyyəyə gətirib çatdırmışıq ki, onlar Azərbaycan və müsəlman qadınlarına belə sataşırlar.
Hər zaman demişəm ki, qadın fahişə deyil, kişi fahişədir ki, qadını o günə salır. İctimai qınaq olmalıdır. Polislər baş verənlərə göz yummamalıdır. Hər kişi bunu götürə bilmir. Bir kişi (kül onun kişi başına) azərbaycanlı qadını ərəbə təklif edirdi.
Azərbaycan qadını isə milli paltarda idi. Ərəblər kənarda durub, baxıb gülürdülər. Azərbaycan qadınını o vəziyyətə qoyan kişi təhqir edirdi ki, “Baxın görün, bizim belə qadınlarımız var”. Ərəblər görə-görə mən bu kişinin üstünə cumub, çənəsinə yumruq zərbəsi endirdim. Düzdür, sonra ciddi problemlərim yarandı. Amma mən bunu etdim”.
/oxu.az/
/oxu.az/
