Son zamanlar izləmələrdə “fake”lərin (süni baxış) sayı həddən artıq çoxalıb. Bunlar mənim də rastıma çıxıb. Hətta yoxlamışam və belə şeyin olduğunun özüm şahidi olmuşam. Amma ad çəkməmişəm.
Bu sözləri Oxu.Az-ın əməkdaşı ilə söhbətində məşhur meyxanaçı Üzeyir Mehdizadə deyib.
Azərbaycanlı ifaçılar arasında “Youtube” kanalının abunə sayına görə bir milyondan çox izləyici yığıb rekorda imza atan Üzeyir saxta yollarla “izlənmə” və “bəyənmə”lər yığan bəzi ifaçıları ifşa edib, onlara sərt mesaj yolladı:
“Yalançı “trend”lər gündən-günə daha da çoxalıb. Zəhmət çəkib, keyfiyyətli işlər görüb, yüksək pilləyə çatırıq, amma bəzi sənətçilər də var ki, üç-beş manat verib, hansısa yollarla izləmə sayını artırıb, tamaşaçıları aldadırlar”.
İstər sənətçilər, istərsə də sosial şəbəkə izləyiciləri arasında bayağılıqda günahlandırılan Mehdizadə “bayağı” sözünü eşidib, od püskürdü:
“Bayağı siz nəyə deyirsiniz? Bayağı sözü hər yerdə istifadə edilir. Yəni bayağılığın tək bəstəkarlığa adiyyəti yoxdur. Bayağı sözünün mənası sadə və bəsit deməkdir. Məsələn, siz əyninizə sadə geyim geyinəndə kənardan bayağı görünür ki?”
“Şou əhli arasında özünüzə rəqib kimi görürsünüz?” sualına Üzeyirin reaksiyası birmənalı olmadı:
“Bu kimi qalmaqallı suallardan qaçıram. Ona görə çalışıram çox az müsahibələr verim”.
Türkiyədə yetərincə tanınan Üzeyir Mehdizadə oranın şou-biznesinə qatılmaq niyyətində oldmadığını dilə gətirdi:
“Hansısa ölkənin şou-biznesinə qatılmaq fikrim yoxdur. İstədiyim odur ki, sənətimlə irəli gedim, Azərbaycanımızı layiqincə təmsil edim. Çıxışlarım tək Türkiyədən ibarət deyil, başqa ölkələrdə də çıxışlarım olur. Xarici ölkədə verdiyim konsertlər anşlaqla keçir. Mənə başqa ölkələrdə də tələbat çoxdur. İşimiz olduqca gedib xaricdə konsertlər verirəm”.
Qeyd edək ki, meyxanaçı Üzeyir Mehdizadə son illər “Youtube” kanalında olan kliplərinin baxış sayı ilə diqqət çəkir. Onun bəzi klipləri 100 milyondan çox baxış toplayıb.
Şahidi olduğunuz hadisələri çəkib bizə göndərin!
Son Əlavə