Bakıda - metronun "Dərnəgül" stansiyasının yaxınlığındakı yaşıllıq ərazinin hasarlanması barədə bir müddət öncə məlumat vermişdik. 
Həmin ünvanda "Dərnəgül" Nəqliyyat Mübadilə Mərkəzinin bir hissəsi də hasarlanmış, dayanacaqlardan istifadə qeyri-mümkün olmuşdu. 
Ərazi hasarlanandan qısa müddət sonra qazıntı işlərinə başlanılmış, yüzlərlə ağacın izi itirilmişdi.
Onu da bildirək ki, sözügedən ərazi paytaxt sakinlərinin istirahət yerlərindən biridir. Ərazi xüsusən axşam saatlarında sakit, küləkli, təmiz havalı olduğundan sakinlər burada gəzişir, bəziləri idman edir, velosiped sürür və s. 
"Dərnəgül" stansiyasının yaxınlığındakı yaşıllıq ərazi hasarlanan zaman burada çoxmərtəbəli binanın tikiləcəyi barədə iddialar irəli sürülürdü. 
Bugünlərdə həmin ərazidə yaşayan sakinlər Yeniavaz.com saytına şad xəbər veriblər. Belə ki, sözügedən yaşıllıq əraziyə çəkilmiş dəmir hasarlar sökülərək naməlum istiqamətə daşınıb. 
Ərazinin qazılmış hissəsi torpaqla doldurularaq qırılmış ağacların yerində yeniləri əkilib. 
Ehtimal olunur ki, məsələyə dövlət rəhbərliyi səviyyəsində müdaxilə olunub və sakinlərin istirahət etdikləri ərazidə yüzlərlə ağacın qırılaraq yerində obyekt tikilməsinin qarşısı alınıb. 
Ərazinin digər hissəsində isə əvvəllər mövcud olan yaşıllığın yeri hələ də boş qalır. Ümid edək ki, həmin boş əraziyə də ağaclar əkiləcək... 
Məsələ ilə bağlı Bakı Nəqliyyat Agentliyinin mövqeyini öyrənib ətraflı məlumat verməyə çalışaq da, suallarımız cavabsız qalır. 
Sözügedən ünvan Binəqədinin sabiq icra başçısı Xaləddin İsgəndərovun vaxtında hasara alınmışdı.//yeniavaz.com
Şahidi olduğunuz hadisələri çəkib bizə göndərin!
Son Əlavə